बाघको आक्रमणबाट बर्दियाका चन्द्र बहादुर गम्भीर घाइते

नेपालगञ्ज डेस्क : बाघको आक्रमणमा परी बर्दियाका एक जना सख्त घाइते भएका छन् । बर्दियाको बारबर्दिया नगरपालिका वडा नं. ९ बैदी चोकको मध्यवर्ती क्षेत्रमा बाघको आक्रमणबाट स्थानीय चन्द्रबहादुर कसेरा गम्भीर घाइते भएका हुन् । च्याउ टिप्न गएको बेला आज बिहान बाघले आक्रमण गरेको हो । उनको मुखमा गम्भीर घाउ लागेको छ ।

बर्दिया राष्ट्रिय निकुञ्जका प्रमुख संरक्षण अधिकृत डा. अशोककुमार रामले निकुञ्जको मध्यवर्ती क्षेत्रमा च्याउ टिप्न गएका बेला बाघले आक्रमण गरेको पुष्टि गरेका छन् । घाइते युवालाई उपचारका लागि अस्पताल लगिएको छ ।

यसअघि पनि त्यस क्षेत्रमा बाघले आक्रमण गरेको थियो । जंगलमा घास दाउरा लिन र च्याउ टिप्न जाने क्रम नरोकिएका कारण बाघले आक्रमण गरेको घटना बर्दियामा बढ्दै गएको छ ।