बर्दियामा दुईटा मोटरसाइकल ठोक्किँदा एक जनाको मृत्यु

बर्दिया : बर्दियाको मधुवन नगरपालिका–३ खातास्थित हुलाकी सडकमा दुइटा मोटरसाइकल ठोक्किँदा एक जनाको ज्यान गएको छ । राजापुरबाट ओराली बजारतर्फ आउँदै गरेको भे १२ प २१९० र सानोश्रीबाट राजापुरतर्फ गइरहेको सुप्रप ०१–००९ प २१०४ नम्बरको मोटरसाइकल ठोक्किएको थियो ।

जिल्ला प्रहरी कार्यालय,बर्दियाका सूचना अधिकारी डीएसपी ऋषिराम घर्ती मगरले भे १२ प २१९० नम्बरको मोटरसाइकल चालक गेरुवा गाउँपालिका–५ का विकास चौधरीको मृत्यु भएको बताए ।

सुप्रप ०१–००९ प २१०४ नम्बरको मोटरसाइकल चालक गेरुवा गाउँपालिका–४ गोलाका जितेन्द्र चौधरी गम्भीर घाइते भएको उनले जनाए । सोही मोटरसाइकलमा सवार सोही ठाउँका ४६ वर्षीय शालिकराम चौधरी घाइते भएका छन् । उनीहरूको जिल्ला अस्पताल गुलरियामा उपचार भइरहेको छ ।