पात्रो
राशिफल
विदेशी विनिमय
सुन / चाँदी
युनिकोड
मौसम
शेयर बजार
नेपालगञ्ज : आगामी फागुन २१ गते हुन लागेको निर्वाचनका लागि बाँके क्षेत्र नम्बर २ मा काँग्रेसका प्रतिनिधि सभा सदस्य पदका उम्मेदवार शुधान्सु कोइरालाले सुशासनका पक्षमा आफुले सदन र सडकमा आवाज उठाउने दृढता व्यक्त गरेका छन् ।
नेपाली काँग्रेसले बाँकेको क्षेत्र नम्बर २ अन्तर्गत नेपालगञ्ज उपमहानगरपालिका वडा नम्बर २० मनिकापुर (राँझा)मा शुक्रबार प्रचार कार्यालय उदघाटन कार्यक्रमलाई सम्बोधन गर्दै विशिष्ट अतिथी कोइरालाले भने, ’म भ्रष्टाचारको विरुद्ध सधैभरी आवाज उठाउनेछु, म आफुले भ्रष्टाचार गर्ने छैन र सुशासनको पक्षमा म सदन र सडकमा सधैँ आवाज उठाउनेछु ।’
नेपाली काँग्रेसले आफुलाई धेरै विश्वास गरेर उम्मेदवार बनाएकाले गलत काम नगर्ने प्रतिवद्धता जनाए । अहिले चुनावको मुखमा उधारो प्रतिवद्धता गर्ने पक्षमा आफू नभएको भन्दै कोइरालाले अगाडी थपे, ’तपाईंहरुको आशीर्वादले नै म निर्वाचित हुनेछु, मनिकापुरको यो उत्साहले सावित गरिसकेको छ, म निर्वाचित भएपछि मनिकापुरका हरेक मुद्दाका पक्षमा सदनमा बोल्नेछु ।’
नेपालगञ्ज–२० मनिकापुर नेपाली काँग्रेसको खम्बा भएको र काँग्रेसलाई यसपटक मनिकापुरका सबै जनताले सहयोग गर्ने विश्वास गरे । क्षेत्र नम्बर २ को नेपालगन्ज र डुडुवाका नागरिकहरुको लागि शिक्षा, स्वास्थ्य, कृषि, पर्यटन, ब्यापार लगायत विषयमा आफुले सधैं बोल्ने प्रतिवद्धता जनाए । नेपाली काँग्रेस नेपालगञ्ज उपमहानगरपालिका वडा नम्बर २० का सभापति खगेन्द्र न्यौपानेको अध्यक्षता एवम नेपाली काँग्रेस की नेतृ तथा लुम्बिनी प्रदेशकी सांसद मिना बोहरा (सिद्धिकी) को प्रमुख आतिथ्यतामा सम्पन्न भएको उदघाटन कार्यक्रममा लुम्बिनी प्रदेशकी सांसद सुशिला नेपाली (वादी), नेपाली काँग्रेसका जिल्ला, क्षेत्र, पालिका र वडा तहका कार्यकर्ता, सर्बसाधारण नागरिक लगायतको उपस्थिती रहेको काँग्रेसका युवा नेता रमेश तिमिल्सिनाले जानकारी दिए ।
