पात्रो
राशिफल
विदेशी विनिमय
सुन / चाँदी
युनिकोड
मौसम
शेयर बजार
काठमाण्डौ : नेपाल क्लाइम्बिङ स्पोर्ट एसोसिएसनको आयोजनामा आगामी चैत दोस्रो साता नेसनल स्पोर्ट क्लाइम्बिङ च्याम्पियनसिप आयोजना हुने भएको छ।
एसोसिएसनले आइतबार पत्रकार सम्मेलन गरी च्याम्पियनसिप चैत ८ र ९ गते (मार्च २१–२२) काठमाडौंमा हुने जानकारी दिएको हो।
दुई दिन सञ्चालन हुने प्रतियोगितामा क्लाइम्बिङको तीनमध्ये लिड र बोल्डर गरी दुई विधामा प्रतिस्पर्धा गराउने एसोसिएसनका अध्यक्ष रमेश पौडेलले जानकारी दिए।
राष्ट्रिय स्तरको खुला प्रतियोगिता भएको हुनाले राष्ट्रिय खेलाडी र १४ वर्षमाथि उमेर भएका इच्छुक खेलाडीले भाग लिन पाउने आयोजकले जनाएको छ।
प्रतियोगिता अन्तराष्ट्रिय महासंघ (आईएफएसी) द्वारा प्रतिपादित नियम र मापदण्ड अनुसार सञ्चालन गरिनेछ। प्रतियोगिताको पहिलो दिन पुरुष र महिलाको क्वालिफिकेसन राउण्ड हुनेछ। त्यसबाट महिला र पुरुषमा ८–८ खेलाडी फाइनल राउण्ड छनोट गरिनेछ।
फाइनल राउण्ड दोस्रो दिन हुने आयोजकले जनाएको छ। महिला तथा पुरुषको फाइनल राउण्डको प्रतिस्पर्धापछि उनीहरूले पाएको अंकको आधारमा विजेता उपविजेता र तेस्रो स्थानमा आउनेको घोषणा गरिनेछ। विजेतालाई नगदसहित मेडल र प्रमाण–पत्र प्रदान गरिनेछ।
प्रतियोगितामा करिब ६० खेलाडी सहभागी हुने अपेक्षा छ। प्रतियोगिताका प्रतिस्पर्धा ठमेल स्थित एस्ट्रेक र काठमाडौं स्पोर्ट क्लाइम्बिङ सेन्टरमध्ये कुनै एक स्थानमा आयोजना गरिने एसोसिएसनका अध्यक्ष पौडेलले जानकारी दिए।
प्रतियोगिताका लागि करिब २५ लाख रुपैयाँ लाग्ने र त्यसका लागि राष्ट्रिय खेलकुद परिषद् र विभिन्न प्रायोजकसँग कुरा भइरहेको संघका अध्यक्ष पौडेलले बताए।
